TIRANË, 10 shkurt /ATSH – I. Vata/ Këtë fundjavë do të luhen ndeshjet e kthimit të fazës gjysmëfinale të Kupës së Shqipërisë për vajza.

Të shtunën është planifikuar të luhet sfida Vllaznia-Partizani, një takim që duket një formalitet për shkodranet që kanë hedhur një hap të madh në ndeshjen e parë të fituar me shifrat 7-0. Kjo ndeshje do të luhet në Shkodër, ditën e shtunë në ora 12:00.

Sakaq, takimi tjetër i kësaj faze do të luhet mes Tiranës dhe Apolonisë. Fieraket do të udhëtojnë drejt kryeqytetit këtë javë, teksa duket se janë një hap larg finales pas rezultatit 4-0 në ndeshjen e parë. Sfida e kthimit do të luhet në kryeqytet ditën e diel në ora 13:00, teksa vajzat bardheblu do të kërkojnë të bëjnë surprizën e madhe dhe të shpresojnë te një rezultat pozitiv.

Pas përfundimit të këtyre sfidave, do të përcaktohet edhe finalja e madhe e këtij edicioni, teksa kujtojmë që fitueset në fuqi të Kupës së Shqipërisë janë vajzat shkodrane të Vllaznisë.

/gj.m/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.