Pago Pago - AMERIKA SAMOA
O ali’i e to’alima ma tama’ita’i e to’atolu na a’afia i osofaiga o fale i Fagaalu ona o fualaau fa’asaina i le masina na te’a nei, na tula’i ai i luma o le Fa’amasinoga Maualuga i le vaiaso na te’a nei.
Sa taoto muamua lenei mataupu i le Fa’amasinoga Fa’aitumalo. Ma o lo’o tete’e i latou i tuuaiga na faila e le malo talu mai le osofaiga a leoleo ia Iuni 05, 2023.
E pei ona lipotia muamua e le Samoa New, o le osofaiga muamua na amata i le fale o Kika Benjamin Tilei i Faga’alu. O Tilei o le pule o le Kamupani teufanua a Tilei (TLC). O le osofaiga lona lua na faia i le fale o Tavita Tali.
Na taofia mai Tilei i lana ta’avale ina ua taofia o ia i luga o le alatele tele i Faga’alu, ae taofia ai Tali a o savali atu i luga o le auala e latalata i le falema’i a le LBJ.
E tusa ai ma le mataupu a le malo, e to’a 10 tagata na sailia ma fesiligia i le taimi o osofaiga, peita’i e na o le to’a 8 na ave i totonu, ma taofia ai i le Falepuipui i Tafuna (TCF). O le isi toalua na tatala i tua.
O le to’avalu o Kika Benjamin Tilei, Kueni Falepau, Aiga Suluao Tu’upo, Kamipeli Taufalele, Adelle Fenumia’i ma Samuelu Luatua; ma Tavita Tali ma Harris Fitiao.
O Adelle ma Kika e fai mai o se tuagane ma se tuafafine; Na iloa mulimuli ane o Kueni o le uo teine a Kika; a o Samuelu o le uo tama a Adelle. O i latou uma e to’alima o lo o tu’uaia o lo o nonofo i le fale o Kika. O le tagata lona ono lea na pu’e fa’apagota mai le fale o Kika, o Taufalele o lo’o fa’amaonia o lo o faigaluega i le TLC.
O Tali i le taimi na pu’e fa’apagota ai o ia, o lo o tu’uaia lona fa’ailoaina o Tilei ma lana uo teine o ana sapalai fualaau fa’asaina, ae o Fitiao na taofia i le toese mai le fale o Tali, ina ua maua i ai fualaau fa’asaina, ma fa’amaonia ai o lo o faigaluega i le TLC.
