Pago Pago - AMERIKA SAMOA
Ina ua fesiligia e le Samoa News, sa fa’ailoa mai e le Pule Sili fou o le falema’i o le LBJ, Dr. Akapusi Ledua, “I a te a’u, o le avea ma Pule Sili o se igoa e ese mai ai ma le fa’aopoopoina o le tiute, o le ta’ita’iga o le tulaga lava lea e tasi – o le ta’ita’i o le auauna lea a tagata.”
I sana tali ina ua fesiligia e uiga i lona filifilia e avea ma Pule Sili fou o le LBJ, na taua ai e Dr. Ledua lona “fiafia tele e avea ma se vaega o lenei vaega vaai mamao ma le naunauta’i, o loo naunau e tuuina atu se soifua maloloina malosi e faavae i faiga sili ona lelei ma le faaaogaina o tekinolosi e faaoo atu ai le soifua maloloina e faataunuuina ai le misiona a le tatou Faalapotopotoga—ia tuuina atu i gasegase e taula’i, atoatoa, maualuga, ma ta’u lelei le tausiga o le soifua maloloina ma manaoga o tagata.”
Na ia fa’ailoa e fa’apea, “ua fa’aeaina o ia e avea ma Pule Sili o le Falema’i o le LBJ lea e atagia mai ai le fa’atuatuaga o le Komiti Fa’afoe a le LBJ ia te a’u e ta’ita’ia lenei fa’alapotopotoga”, ma faaopoopo mai, “Ou te manatu o lenei tofiga o se valaauga e auauna atu ai i tagata o Amerika Samoa.”
Na faaauau le tala a Dr. Ledua, “E ui lava i luitau o loo ia i tatou, ae ou te talitonu faatasi ma le Atua, o lē o loo valaau mai ma saunia mai, e mafai ona tatou faatoilaloina nei luitau ma tuuina atu taunuuga o mea ua valaauina ai au e fai.”
“I le 20 tausaga talu ai, ua ou aʻoaʻoina ma malamalama ai i le faiga o le soifua maloloina i Amerika Samoa, o loʻo galue i tulaga uma o le falemaʻi ma le pulega faʻapitoa i le LBJ Tropical Medical Center,” o lana tala lea. "E tele avanoa lelei e faʻaleleia ma tuʻuina atu le tulaga maualuga ma le saogalemu o le soifua maloloina.”
Faʻatasi ai ma le Komiti Faafoe, taitai sinia o le falema’i ma nisi, “matou te maua le vaʻaiga sili e faʻaleleia atili ai le Soifua Maloloina."
Na fa’ai’u le saunoaga a le Pulesili o le LBJ i lana fa’afetai i “le tatou Malo ma Ta’ita’i o le atunuu mo fautuaga alofa ma upu fa’amalosi i tausaga uma o lo’u tautua ai i Amerika Samoa.
“O lenei mea ua mafai ai ona ou faaauau pea ona auauna atu i o tatou tagata ma le alofa ma le agalelei, ma le malamalama e talisapaia nei auaunaga,” o lana tala lea.
O Dr. Ledua, i lana uluai faalauiloa faalauaitele e avea ma Pule Sili fou o le LBJ, ia Iulai 18, 2023, sa auai i se iloiloga a le Senate na faia e le Komiti o le Soifua Maloloina/ Falemai. Ma sa auai o ia ma isi sui sinia o le falema’i e aofia ai le Taitai Fono o le Komiti Fa’afoe ia, Dr. Malouamaua Tuiolosega.
O le iloiloga sa avea ma auala e logo aloaia ai afioga i senatoa i le faaiuga a le Komiti Fa’afoe e filifilia ai Dr. Ledua e avea ma Pule Sili fou.
O le iloiloga sa taitaia e le taitai komiti ia senatoa Tuiasina Dr. Salamo Laumoli. O le autu lea o le fia maua lea o molimau mai ta’ita’i o le LBJ e uiga i le i’ugafono na folasia e le peresetene o le Senate ia Tuaolo Manaia Fruean ma isi senatoa e to’asefulu, e lagolago ai le toe fa’aleleia ma le fa’aonaponei o le falema’i o lo o i ai nei, nai lo le fausia o se ‘mini-LBJ’.
Saunoa Dr. Tuiolosega e fa’apea, o le falemai fou, e pei ona fuafua e le malo, e le o se manuia mo le teritori, ma e lagolagoina ai LBJ le fautuaga a le US Army Corps of Engineers na tuuina atu i le 2019, ina ia fa’aleleia le falema’i o loo i ai nei.
Ua fautuaina e le i’ugafono a le Senate ia Kovana Lemanu P. S. Mauga ma le Malo o Amerika Samoa ina ia “mulimuli i fautuaga a o tatou tagata tomai faapitoa faafomai i le lotoifale ma faasoa atu le $300 miliona atoa o le American Rescue Plan Act (ARPA) tupe faavae e teu i totonu o le falemaʻi o le LBJ Tropical Medical Center ma lagolago a latou taumafaiga e mulimuli i fautuaga a le US Army Corps of Engineers e fausia se fale fou i le LBJ, nai lo le fausiaina o le falemaʻi fou i le LBJ”.
