Pago Pago - AMERIKA SAMOA
Ua mae'a le faiga o le fa'atulafonoina o le fa'atagaina o le si'itia o le tau mo tagata lautele e malaga ai i luga o pasi-tua ma ua fa'aagaaga nei le tau fou - e pei ona fa’alauiloa e le komisi a le malo e gafa ma mataupu fa’apenei.
Na fa’ailoa e Manu Talamoa, o le Ta’ita’ifono o le Komisi o Pisinisi, lea e fa’atonutonuina taxi ma pasi, i le failautusi o Amerika Samoa, le afioga i le Lutena Kovana ia Talauega Eleasalo Ale i se tusi i le aso 23 Iuni e fa’apea, o le fa’aaliga o lea tulafono na fa’alauiloa muamua i luga o le KVZK-TV ma le itulau o upega tafailagi a le ASG i le aso 8 o Me.
E leai se iloiloga na faia o lea mataupu ma e leai foi se isi sa talosagaina se iloiloga.
Ma o le aso e amaga ai le siitaga ole pasese ole aso 19 Iulai 2023.
O tau o pasi mo auala uma e si'itia i le 25 sene. O se fa’ata’ita’iga, mai le Maketi i Fagatogo e o’o atu i le fetaulaiga o malae va’alele, o le pasese fou e $1.50, ua si’i a’e mai le $1.25. O le pasese mai le Maketi i Fagatogo i Leone e $1.75.
Mo nofoaga i le itu i sisifo o Leone e oo atu i Amanave, e aofia ai Aoloau ma Asau, o le pasese mai le Maketi i Fagatogo e $2. O le malaga pasi i tua atu o Amanave o le a tau nei le $2.25.
Ua siitia foi pasese a tamaiti aoga e pei ona fa’atulagaina.
O le pasese mo tamaiti aoga tumau a le Kolisi Tuufaatasi a Amerika Samoa (ASCC) lea sa 50 sene ua $1 nei. E tatau i tamaiti aoga ona fa'aalia a latou ID tamaiti aoga tumau, ma e tatau ona malaga mai le fale i le kolisi pe toe foi mai. I faaiuga o vaiaso ma aso malolo e totogi ai e tamaiti aoga ASCC le pasese masani.
O lenei tulafono fou ua fa’avaeina ai fo’i le vaega e fa’atulaga ai pasese mo fanau aoga i aoga tulagamuamua ma aoga maualuluga e 50 sene. E tatau fo'i ona latou fa'aali pepa ID tamaiti a'oga ma malaga mai le fale i le a'oga pe toe fo'i mai. I aso malolo ma faaiuga o vaiaso latou te totogi ai pasese masani.
