Pago Pago - AMERIKA SAMOA
O le Aso Lulu o le vaiaso ua tuanai, na toe ave ai tua, pe faaleaogaina ai, se pili na faauluina e le Faigamalo a Amerika Samoa, e tu’uina atu ai le aia tatau i le aufaigaluega a le Matagaluega e puipuia tuaoi ma le lotoifale o Amerika Samoa (DHS), e ave faapagota pe lokaina i latou e a’afia i suesuega i Fualaau Faasaina ma le ave faanana o tagata, i se iloiloga sa faataunuuina a le Maota o Senate.
O se iuga na ioeina uma e totino o le Komiti o le Puipuiga Lautele ma le DHS i le vaiaso ua tuanai, lea na molimau ai le Faatonusili o le DH, le susuga Samana Semo Veavea faapea le sui Loia Sili ia Roy J. D. Hall.
Sa faamamafaina e le afioga Senatoa Togiola T. A. Tulafono, e tatau ona manino le eseese o tiute a le Ofisa o Leoleo ma le vaega a le DHS, po o fea e gata ai matafaioi a leisi matagaluega ae amata ai tiute o leisi matagaluega.
Sa ia ta’ua foi lona tete’e i le fa’aaogaina o le upu ‘Leoleo’ i totonu o le pili. Atoa ai ma sona atugaluga i ni fe’ese’eseaiga e ono tulai mai i le faatinoina o tiute a Matagaluega e lua. Sa ia fautuaina le fa’aaogaina o se faaupuga e mafai ona iloa ai le eseesega o le aufaigaluega a leoleo ma le DHS. Ma ia ma’oti mai i totonu o faaupuga o lenei pili, ia le mea e gata mai ai tiute a lea matagaluega ma lea matagaluega, ina ia iloa ai e sui o le Ofisa a Leoleo, pe a taunuu i se nofoaga o tulai mai ai se faalavelave ae iloa o lo o aafia ai Fualaau faasaina po o le ave faanana o tagata, e ao ona o latou logoina le vaega a le DHS.
Na fa’aauau le saunoaga a le afioga i le Senatoa, a le faia lea tulaga, o le a faapea ona tulai mai se faafitauli i le taunuu uma o sui o ofisa e lua i se nofoaga e tupu ai se faalavelave ma o le a nunumi atili ai le mataupu, ona o le a le iloa po o le fea o matagaluega e iai le aia tatau e faataunuuina le galuega.
Sa fautuaina foi e le afioga Senatoa ia le toe iloiloia o lenei pili ma ia toe faia iai ni suiga e mafai ai ona leai ni faafitauli e ono tulai mai i le faatinoina o tiute a matagaluega e lua.
O leisi tulaga na faatulai e le afioga Togiola, o le manaomia o se nofoaga mautu ma le saogalemu, e taofia ai tagata e lokaina mai i faalavelave faapenei. E pei ona ia ta’ua, e leai se aia tatau o iai i le DHS e lokaina ai ni a latou pagota i le falepuipui i Tafuna. Ma e tusa ai ma tulaga o le tulafono, e na o le Ofisa a Leoleo e tali iai leoleo o le falepuipui.
E ui ina sa saunoa le susuga i le sui Loia Sili, e na o le tasi lava le falepuipui a le teritori ma e na o le pau lava lona matafaioi, o le taofia ai o tagata a o faagasolo a latou iloiloga i le faamasinoga, ae peitai, sa tali Togiola, o tulaga uma na, e ao pea ona faatagaina mai i le tulafono. Ae o le taimi nei, e leai se pule i le DHS e tuu pe taofi ni a latou pagota i totonu o le falepuipui i Tafuna, a o faagasolo a latou suesuega. Afai e latou te faia lea tulaga, o le a a’afia ai aia tatau o tagata ma tatala ai le avanoa i tagata e faaulu ni a latou tagi e faasaga i le malo. O lona uiga, na o le pau le tali o lea faafitauli, o le fau o se fale faapitoa, e taofi ai tagata ia o lo o ave faapagota e le vaega a le DHS.
Na faamanino mai e le afioga Samana o le pule e ave faapagota ai se tagata e pei ona ta’ua i totonu o le pili sa iloiloga, o lo o patino lava ia i latou ua aafia i solitulafono o Fualaau faasaina ma le ave faanana o tagata. Ma sa ia ta’ua foi, ua maea ona o latou soalaupuleina lenei mataupu i se fale faapitoa mo a latou pagota, ma loia a le faigamalo a Amerika Samoa faapea sui o le malo feterale. Ma sa fautuaina o ia ina ia saili se nofoaga malu puipuia.
Na fa’aalia foi e le afioga Senatoa Malaepule Saite Moliga, o se tasi ua loa ona galue i totonu o le Ofisa a Leoleo, sona foi atugaluga e tusa ai ma lenei pili, ona o le a faapea ona aafia ai aia tatau o tagata lautele, pe afai ae tu’uina i le aufaigaluega ale DHS le pule e loka ai tagata, ae le malamalama i tulaga uma o le tulafono.
Sa uunaia e Malaepule ia sui o le komiti faapea ma molimau na auai i lea iloiloga, ina ia toe Iloilo mataupu uma e pei ona sa faatulai mai e le afioga Togiola, pe a o latou toe iloiloina lenei pili ina ia mafai ai ona foia faafitauli e ono tulai mai i le va o le aufaigaluega a le DHS ma tagata o le a latou lokaina aua e i’u lava ina lavelavea atu ai ma le malo o Amerika Samoa.
Na fesiligia e le afioga Senatoa Fonoti Tafaifa Aufata ia le Faatonusili o le DHS, po o fea nu’u ia o lo o mautinoa o lo o tele ai faafitauli i Fualaau faasaina, na tali le afioga Samana, o Vaitogi, Leone, Malaeloa, Faleniu ma Pavaiai.
I le iuga o le iloiloga, sa faatonuina ai e le Taitaifono o le Komiti, le afioga Senatoa Uluao Letuli ina ia galulue faatasi le Ofisa o le Loia Sili faapea Loia a le Senate ina ia toe iloiloina ma faaopoopoina tulaga o lo o manaomia, ona toe faaulu atu ai lea i luma o le Senate.
