Pago Pago - AMERIKA SAMOA
E mitamita le kamupani a le StarKist e faalauiloa le faamanatuina o le 60 tausaga talu ona fa’atuina le kamupani a le StarKist Samoa i Amerika Samoa. A’o fa’atautaia e le StarKist Samoa ni fa’amanatuga i lenei tausaga, sa fa’ai’u le fa’amanatuga i fa’afiafiaga fa’apitoa i le fa’aiuga o le vaiaso ua te’a atu nei. O le ‘auga o nei fa’amoemoe o le aloaia lea o le aufaigaluega e silia ma le 2,300 i le StarKist Samoa.
I se pepa o fa’amatalaga mai le kamupani, o lo’o fa’ailoa ai, o le susuga ia Chae-Ung Um, Peresetene & Pule Sili o le StarKist Co., o lo'o i Amerika Samoa nei ma Young Choi, Sui Peresetene Tupe, COO & CFO, e fa'amamaluina le fa'amanatuina o lea fa’amoemoe.
O le amataga o le vaiaso ua te’a nei na auai ai le alii o Um i sauniga lotu a le Sifi i le Ao ma le Po, o se tu masani lea e matauina i aso uma i le fale tuuapa a o lei amataina sifi taitasi, e faia i totonu o le StarKist Samoa Packing Room.
Saunoa le susuga ia Uma i le au faigaluega e fa’apea, “A o tatou faamanatuina lenei aso faamanatu, e momoli atu ai le agaga fa’afetai tele, ma fa’asoa atu lenei fa’amanatuga i a tatou tagata faigaluega tulaga ese, le tatou aiga i le StarKist e taua i la tatou faigamalaga. Faafetai mo mea uma ua e faia."
I le avea ai o le StarKist Samoa ma kamupani tuma'oti aupito tele i Amerika Samoa, o lo'o fa'atinoina e le StarKist Samoa ni laasaga taua e fa'aalia ai lona agaga fa'afetai. E tele fa'atinoga 'ese'ese o lo'o fa'atulagaina mo le fa'amanatuina o le 60 tausaga, e aofia ai:
• O le Aso Faraile ua te’a, Setema 1, sa maua ai e tagata faigaluega a le StarKist se aso malolo e fa’amanatu ai le 60 tausaga. I le afiafi o lea aso sa talimalo foi le kamupani i le 60th Anniversary Dinner, e momoli atu ai le agaga faafetai i paaga a le Malo ma le aufaipisinisi sa sao i lona manuia i le silia ma le onosefulu tausaga.
• O le Aso To’ona’i ua te’a, Setema 2, sa auai tagata faigaluega ma o latou aiga i le Veterans Memorial Stadium mo le aso o le va fealofani ma le tauvaga fa’amalosi. Sa fa’atumulia le malae i lea aso fa’apitoa.
I le agaga fesoasoani a le kamupani, na tauaao atu ai e le Pule Sili o le StarKist Samoa ia Injoo Ha le $25,000 o foa’i e tutusa mo le lima (5) faalapotopotoga alofa i le teritori, faapea ai ma le falemai o le LBJ. O nei sao na mafai ona maua e ala i tupe maua mai le StarKist 60th Anniversary Golf Tournament na faia i le aso 19 o Aokuso, 2023.
O le aso ananafi sa malolo ai foi galuega i le StarKist e aloaia ai le aso malolo o le Labor Day i Amerika Samoa ma le Iunaite Setete atoa.
