Pago Pago - AMERIKA SAMOA
I se pepa o fa’amatalaga mai le Ofisa o le Kovana, sa fa’ailoa ai e fa’apea o le aso 6 Setema 2023 na faia ai se asiasiga a le afioga Kovana ia Lemanu P. S. Mauga i le kamupani a le StarKist Samoa i Satala, ma fa’ailogaina ai se matati’a taua i le va o le malo ma lenei kamupani taua tele i Amerika Samoa. O le Pule Sili o le StarKist Samoa, le susuga ia Injoo Ha ma le 'au pulega na fa'afeiloa'ia ma le māfana le Kovana mo se faatasiga.
I le asiasiga a le afioga i le Kovana, na maua ai le avanoa e maimoaina ai le fa’agaioia o le kamupani, ina ia maua ai se malamalamaga i le lavelave o le gaosiga o tuna. O le aufaigaluega a le StarKist, ua lauiloa i le le maluelue o lo latou tuuto, na faafeiloaia ma le mafanafana, ma tatalaina le asiasiga i se viiga mai le loto ma se taimi o le tatalo.
Sa maua se avanoa e saunoa ai le kovana i le aufaigaluega, ma fa’ailoa atu ai, “Ou te fia momoli atu la’u fa’afetai tele mo galuega o lo’o tou faia iinei i le StarKist, o lo outou fa’amaoni e le gata e fa’amumuina ai lamupani ae e fafaga ai le tamaoaiga atoa o Amerika Samoa, o outou o le ivi tua o lo tatou atunuu, ma ou te faafetai atu mo la outou tautinoga le maluelue."
Ina ia mautinoa e le kovana le fa’afoeina o galuega mo le gaosia o apa tuna, sa auai atu i galuega o le laina laulau, ma auai i le faagasologa o le faamamaina o iʻa. O lenei poto masani e le gata o se faatusa ae o se tala faasolopito, ina ua avea o ia ma Kovana muamua na auai malosi i lea vaega o le galuega i le fale ‘ia.
I le mae’a ai o lana galuega i luga o le laina, na ta’ita’ia ai loa e le Kovana le tapenaina ma le fa’amaluluina o oloa, ma maua ai le malamalamaga atoatoa i le auala e saunia ai ma fa’agaioia oloa. Na fa'aalia fo'i e le Starkist le taua o numera fa'asologa o lo’o i ai i apa tuna.
Na taua e Kovana Lemanu se tala patino i lana asiasiga: “A’o ou i ai i le militeri i fafo, sa o mai a matou (mea ‘ai saunia) MREs (Meals Ready to Eat) ma taga o le StarKist Tuna, o le itu faapitoa taua o le fu’a a Amerika Samoa sa i luga o taga. I le avea ai o se fitafita Samoa e mamao ese mai le aiga, sa ou mitamita ai i le vaai atu i ai ona sa saunia taga tuna e lima o o tatou tina ma tama mai le teritori, o le taimi nei, ua ou iloa lelei le faiga, saunia, ma afifiina o le tuna, e sili atu le talisapaia o lena tamai taga tuna.”
Sa faia ai fo’i fa’atalatalanoaga ma le Starkist Samoa e fa’atatau i le lumana’i o auaunaga e mafai e le malo ona ofoina atu e lagolago ai tagata faigaluega fa’amaoni, e pei o le fa’afaigofieina o auaunaga tau faletupe, fa’afaigofie le failaina o lafoga, ma auaunaga fa’afoma’i e mafai ona maua i totonu o le kamupani.
Na faaalia e le alii pule sili o StarKist Samoa, Injoo Ha, lona agaga faafetai tele i le asiasiga a le alii kovana ia Lemanu ma ia tauaaoina atu meaalofa faamavae e fai ma faailoga o le agaga faafetai.
FA’AMALO KOVANA ILE 60 TAUSAGA STARKIST SAMOA
O le afioga i le Kovana, fa’atasi ai ma lona faletua ia Ella, na auai i le fa’amanatuina o le 60 tausaga o le StarKist Samoa i le Aso Faraile, Setema 1, 2023. O lenei fa’amoemoe sa fa’atautaia e le StarKist, o se fa’amanatuga fa’amomoi loto i lana faigapa’aga tumau ma pisinisi i totonu o le atunu’u.
I lana saunoaga fa’agae’etia, na fa’ailoa ai e le afioga i le ali’i kovana ia Lemanu ni mafaufauga loloto i le faigamalaga mata’ina na fa’atautaia e le StarKist ma tagatanu’u o Amerika Samoa.
“I le 60 tausaga ua tuana’i, o le StarKist, e pei fo’i o si o tatou atunu’u pele o Amerika Samoa, ua mafai ai fo’i ona fa’asagatau i afā,” o le saunoaga lea a Kovana Lemanu. “Mai afā tetele na taia i le 1962 ma le vevesi o le 90s, e o’o mai i lu’itau talu ai nei ona o le fa’ama’i o le lalolagi, sa tutu malosi uma le StarKist Samoa ma lo tatou nu’u.”
I le faailoaina o le aafiaga tele o le StarKist i olaga o tagata Amerika Samoa, na saunoa ai Kovana Lemanu, “O le toatele o o tatou ta’ita’i i aso nei, o oloa fa’amaualuga a matua sa galulue ma le le fiu i le StarKist.” Sa ia toe fa’apea mai, “Ua matou lagonaina le tiga o fa’alavelave fa’alenatura ua sosolo ai o tatou atumotu, e pei fo’i o le StarKist, o le fa’ama’i, ma ona fa’alavelave, na tofotofoina ai i tatou uma, ma ua tu malosi ai le StarKist ma Amerika Samoa”.
O le talosaga mai le loto o Kovana Lemanu i le Pule Sili o le StarKist, na ia fa’ailoa ai, “O le matou talosaga fa’amaoni i le Pule Sili, ina ia fa’aauau pea ona fa’atumauina le StarKist i luga o le tatou gataifale, ina ia mautinoa o lo’o tumau pea Amerika Samoa o se vaega taua o le aiga StarKist o le galuega fita a o tatou tagata, ua tatou siitia ai Amerika Samoa i le tulaga ua i ai nei.
I le lotolotoi o tala fa'asolopito o lu'itau ma manumalo, ua fa'ata'ita'i mai e le StarKist le maufetu i le feagai ai ma faigata. I le mae’a ai o fa’alavelave fa’alenatura ma fa’alavelave fa’aletagata, o lo’o fa’aalia pea e le StarKist lona fa’amaoni i le atunu’u o Amerika Samoa ma lona fa’amaoni i le fo’ia o fa’alavelave.
