Pago Pago - AMERIKA SAMOA
O le iloiloga a le Komiti o Aoga a le Maota o Sui i le vaiaso ua te’a sa fa’ailoa ai e le Matagaluega o le Soifua Maloloina e fa’apea o le tala tuai lava lea pe a oo i le tausiga o le aoga i tausaga ta’itasi.
O le Fa’atonusili o le Matagaluega o Aoga (DOE) ia Taulauega Dr. Samasoni Asaeli, o le sui fa’atonu ia Folau Fa’afetai Teofilo, o le supavaisa o Don McMullin, ma le Sui Pule o le Matagaluega o le Soifua Maloloina ia Aileen Solaita, sa molimau i le iloiloga.
Ina ua fesiligia ia Folau e uiga i le sauni o aoga, na ia taua ai se ripoti e le’i tuuina atu i le Samoa News, ona e “le faalauaiteleina” lea o lo o auiliili mai ai le tusa ma le 15% - 18% o galuega ua mae’a i le aoga maualuga i Fagaitua. Sa aofia ai fo’i le aoga a Leone Midkiff i lenei ripoti, ma e tusa ma le 90% o le galuega ua mae’a.
O le taimi lava lea na saunoa ai Solaita, “E o’o mai i le taimi nei, o le fa’alavelave tele lava o lo’o feagai ma i matou, o le fa’aleleia lea o faleaoga, ma o tausaga uma lava, e le o fa’amalieina le tausiga o faleaoga ma o lo’o fa’atali le DOE e fa’atino so’o se galuega fa’aleleia o falea’oga se’i vagana ua faia le asiasiga a le Matagaluega o le Soifua Maloloina.”
“Ou te le o mautinoa po’o le a se isi mea e mafai ona ‘ou fai atu ai e tusa ai o lea tulaga aua o mea lava ia e pei ona maitauina i tausaga uma. O fa’afitauli autu uma o a’oga nei i tausaga ta’itasi, o le le lelei o le tausiga, ma o le fa’afitauli lona lua o le a’afia o anai,” o le saunoaga lea a Solaita. “E fa’anoanoa fo’i ona o le tele o fale a’oga na fa’ato’a fau, sa vave ona fa’anofoia, e aunoa ma se polokalame e tausia ai.”
O le isi mataupu na laga e Solaita o le leaga o le savili i totonu o aoga - aemaise lava le le lava o ili ma ea malulu mo aoga. O isi a’oga e pei o Pava’ia’i ma Tafuna elementary ua i ai uaea mata’utia ma ua ta’ua e Solaita, o mea lava ia na maua mai tausaga ua mavae sa latou talanoaina ma a latou faia ni asiasiga tulitatao, latou te iloa ai o le tuai ma e le'i suia lava uaea mata leaga.
“Faatasi ai ma le tufatufaina atu o vailaau mo le Lymphatic Filariasis ma le iloiloina o se iloiloga o aafiaga na matou faia i le tausaga talu ai, na matou iloa ai o loo salalau e namu se “anufe” e mafua ai le lymphatic filariasis”, o le saunoaga lea a Solaita. “O le tausaga foi lenei, na tatou faalogo ai i le dengue lea e feaveai e namu, ma ou te tuuina atu nei sailiiliga i le mamalu o le Maota ma ou te le o mautinoa po o le a se isi mea e mafai ona ou fai atu ai aua o le taimi nei, o sailiiliga ia ua tatou maua. matau i aoga a le malo.”
O le isi mataupu na laga e Solaita, o le tumama lea o potu aoga, lea na latou maua ai ni otaota o isumu i faamalama, kesi, ma totonu o kapoti - “o nei mea e tatau ona tausia. Ma o le mafuaaga lea e tatau ai ona sui uaea screen ina ia taofia ai isumu mai le a’afia o potu aoga,” o le saunoaga lea a Solaita a o ia toe ta’ua ai e le o se mea fou ia mea na maua ma ua tele taimi na talanoaina ai i tausaga ua mavae.
“Sa fa’asea fo’i le aoga maualuga a Tafuna i le tafe mai o le vai mai le fa’alo ma totonu o le potu aoga pe a tetele timuga. O lo o matua mata’utia le tulaga o le faleta’alo a le aoga maualuga i Tafuna, o lo o teuina ai e fanau aoga a latou mea ta’alo ma lavalava fa’apitoa, ma le isi, e le o ni mea fou na maua,” o le saunoaga lea a Solaita. “E pei e fa’atali le Ofisa o A’oga se’i o’o mai le Public Health ma fai le iloiloga, ona amata loa lea ona fa’atino e le DOE galuega fa’aleleia ia e tatau ona fa’aauau, galuega i aso uma.”
O le vaiaso lenei ua toe amatalia ai aoga ale malo mo le tausaga aoga fou 2023/2024. Ma o lo’o fa’apopoleina pea le Fono Faitulafono i le le o sauniga lelei o faleaoga.
