Pago Pago - AMERIKA SAMOA
E lua tulafono taufa’aofi o lo o fuafua e fa’atatau i le tulaga o tupe fa’aopoopo, o lo o i luga o le lisi o mataupu mo le Fono Fa’apitoa a le Fono Faitulaga i le masina fou, lea ua valaauina e le afioga i le ali’i kovana ia Lemanu P.S. Mauga lea na tuuina atu le valaau a o lei tuua Amerika Samoa i le amataga o le vaiaso na te’a nei, ina ia auai i le fonotaga a le US Coral Reef Task Force i le US Virgin Islands.
E tusa ai ma le tusi valaau a le alii kovana, i le aso 16 Oketopa, o le fono faapitoa muamua a le Fono Faitulafono mo le nofoaiga lona 38 e tauaofia i le Aso Gafua, Novema 13, “mo se vaitaimi e le sili atu i le sefulu (10) aso faakalena”.
“Ou te talitonu o le a outou silafia le manaomia o le iloiloina o nei mataupu taua ma ou te faafetaia le silasila toto’a” i le Fono Faitulafono i le lisi o mataupu o le fono faapitoa, o le tusi lea a le alii kovana i ta’ita’i o Fono.
E 2 mataupu o lo o taua i le tusi a le alii kovana mo le tauaofiaga faapitoa, ma o le mataupu muamua o lo o fuafua e fa’atatau i le $2.5 miliona mai tupe maua e le’i faaaogaina ma tupe maua mai le tausaga tupe 2022 e fa’aopoopo i le paketi o le tausaga tupe 2024.
E leai se fa'amatalaga na tu'uina mai i le tusi e fa'atatau i lenei mataupu i tupe fa’aopoopo ma pe fa'apefea ona fa'aalu le fa'atupega o lo'o talosagaina.
O le mataupu lona lua o lo o fuafuaina mo le fonotaga fa'apitoa, e fa'atatauina lea i le $36 miliona “O Tupe Maua Fa'asili na Maua e Faaopoopo i le Tala Fa'atatau o le Tupe 2023.”
E ui e lei ta’ua ni faamatalaga auiliili i le tusi valaau e uiga i le $36 miliona, ae fa’ailoa atu e le Samoa News e faapea, o le tulafono taufaaofi lava lea e tasi na tuuina atu e le Faigamalo a Lemanu-Talauega i le tauaofiaga lona 2 a le Fono Faitulafono lona 38 talu ai nei, lea na faia ai le fa’aiuga a le Senate ma le Maota o Sui e taoto lenei mataupu i komiti se’i toe tauaofia le Fono Faitulafono i le masina o Ianuari i le tausaga e 2024 ona iloiloina lea.
O le finagalo o senatoa ma faipule e faapea, talu ai o tupe ua uma ona faaalu e le Faigamalo, ae na o le sailia o le faamaoniga a Fono, e le tau faanatinati i le iloiloga ma le faaiuga.
O le talosaga a le kovana sili mo le fono fa’apitoa e fa’ailoa i le vaitau, ae o lo’o malaga nisi o sui o le Fono i fafo atu o Amerika Samoa. O nisi o sui o le Fono sa latou fa’ailoa i le Samoa News manatu, e fesiligia ai le taua o le fono faapitoa e valaauina o lenei vaitaimi, ae o mataupu e mafai ona fa’ataunuuina pe a toe tauaofia le Fono Faitulafono ia Ianuari 2024.
I lalo o le Fa’avae Toefuata’iina o Amerika Samoa, o lo o i ai i le kovana o lo o nofoia le nofoaiga le pule e taloina ai se fonotaga fa’apitoa, ma e tatau ona aofia i le valaau mataupu e iloilo e le Fono, atoa ai ma le umi e tatau ai ona fa’ataunu’u le Fono Fa’apitoa. O lo o i ai fo’i le pule a le ali’i kovana e fa’aopoopo ai aso o le fono fa’apitoa e usuia ai.
