Pago Pago - AMERIKA SAMOA
Na feagai le Loia Sili ia Fainuulelei Alailima-Utu ma fesili mamafa a sui o le Fono Faitulafono i le le lava o loia i totonu o lana matagaluega, lea ua mafua ai le tele o mataupu i luma o le faamasinoga, ma ua avea ai ma aafiaga o le fa’atumulia o le Toese i Tafuna.
O nei mataupu sa tulai mai i le taimi na iloiloina ai e le Fono le tupe fa’asoasoa a le Matagaluega o lo’o taitai ai le Loia Sili.
Na fesiligia e Faipule Larry Sanitoa le afioga ia Fainuulelei pe toafia loia i totonu o lana matagaluega. O le tali a Fainuulelei e faapea, e toaiva loia i le taimi nei e aofia ai ma le sui Loia Sili ia Roy Hall, Jr., e to’afa i le vaega o le Civil Division ae toatolu i le vaega o solitulafono. Na ia toe manatua e faapea, ina ua faatoa tulai mai o ia i le tofi, ia Ianuari 2001, e na o le toafa i latou – e toalua i le Civil ma le tasi i le Vaega o Soligatulafono.
Saunoa ia Sanitoa e fa’apea, i le vaiaso na te’a nei i le iloiloga a le Maota o Sui, na fa’ailoa atu ai ia i latou e fa’apea, mai le silia i le to’a 300 i latou o lo o taofia i le Toese i Tafuna (TCF), e to’a 200 o lo o fa’atalitali i mataupu a le fa’amasinoga e le i mafai ona fofogaina, ona e leai se loia e fesoasoani i le loia a le malo. Sa ia taua e fa’apea, o le mafua’aga o le fa’afitauli o le le lava lea o totogi o lo o ofoina atu, o le mafua’aga lea o le omai ma o atu loia.
Faaalia e le faipule, e faigofie lava ona oo atu le alii Loia i le alii kovana, ma e tatau ona ia talosagaina nisi seleni e sii ai totogi o loia i se aofaiga faatosina, ona e na o i latou e faatoa mae‘a a‘oa‘oga faaloia e faigaluega i le fua o le totogi o lo o i ai nei e maua ai le poto masani ona alu ai lea mo laufanua lanumeamata i fafo.
Na ioe Fainuulelei i le saunoaga a Sanitoa, e fa’apea, o totogi o lo o ofoina atu i inei e leai se mea pe a fa’atusatusa i totogi o lo o ofoina atu i le atunu’u tele, ae o le tulaga o lo o i ai lana matagaluega e fa’alagolago lava i le latou paketi. Sa ia fa’ailoa fo’i, o lo o fuafua le kovana e siitia totogi o loia ma isi tagata tomai faapitoa e pei o fomai, inisinia ma iu ai lava i tagata faigaluega uma a le malo.
Faaalia e Fainuulelei o loo i ai se manaoga vave mo le sailia o ni loia e fesoasoani i le ofisa o le Public Defender ma o lo o fesoasoani lona ofisa e ala i le faasoaina atu o faamatalaga i luga o sootaga i luga o le upega tafa‘ilagi ma isi tulaga i luga o le initaneti o lo o soosootauau ai loia ma sosaiete a loia mai le atunuu tele, i le sailia o galuega.
“O le tumutumu o le toetele i totonu o le falepuipui ua mafua ai ona matua’i vevesi le isi mea o lo’o matou fa’atalitali i ai, o le a maliu se tasi,” o le saunoaga lea a le Sui Fofoga Fetalai Fetu Fetui, Jr. “Ma e te nofonofo lava e leai se mea e fai. E le lava le aufaigaluega a le falepuipui ma e mafua ai isi faafitauli uma. O le mea lena e tupu pe a e le usitaia le fautuaga a le Fono, tatou te faatali sei maliu se tasi pe tupu se mea matuia”.
O atugaluga o le Sui Fofoga Fetalai na faaalia e se pagota na faafesootai le Samoa News e ala i imeli i le amataga o le masina nei, ma lipotia ai le “matua le tonu” i le faagaioia o le TCF lea ua leva tausaga o fai, ma le “faatamala” o aseta a le TCF, o le Bravo Building o loʻo taofia ai pagota o loʻo faatalitali.
Na taua e le ali’i pagota e fa’apea, e tatau ona fa’asalaina lenei fale fa’apitoa ma ua mae’a ona ia fa’afesoota’i le pulega feterale e uiga i lenei mataupu. “E le gata e le talafeagai mo fale, ae ua matua tumu,” o lana tala lea. “O le tele o faleu’u ma ta’ele e le aoga, leaga le savili, ua tautau i lalo uaea eletise ma fa’aaoga e fai ma mea e fa’aoga ai, e palapalā ma le manogi leaga o faleu’u ua malepe ua tumu ai le ea.”
E tusa ai ma asiasiga, na ia faaalia ai e lei i ai ni asiasiga a aiga na faatagaina mo le silia ma le tolu tausaga i le taimi nei.
O le tulaga lea ua tulai mai ai vevesi i totonu o le lotoa ma tulai mai ai misa e lima pe ono i le vaiaso, o le faamatalaga lea a le pagota. Ua avea le sola ma mea masani ma e oo lava i leoleo ua fiu ona o le leai o ni ovataimi ua mafua ai ona feteenai ma le pulega ma pagota.
Na fa’ailoa e Fetui Jr e fa’apea, e tatau ona toe fa’afo’i tagata sitiseni mai Samoa o lo’o taofia i le TCF, pe afai ua matua’i tumutumu le nofoaga ona o lea tulaga.
Na tali Fainuulelei e fa’apea, ua mae’a ona fa’atinoina lana fautuaga mo le fa’aopoopoina o leoleo o le toese e to’a 40, ina ia fa’amama avega i le aufaigaluega o lo o feagai ma le to’atele o pagota.
Saunoa le afioga i le ali’i senatoa ia Satele Aliitai Lili’o o ia o se tasi o sui o le Komiti Fa’afoe o Femalagaaiga le fa’afitauli o le ova o aso faigaluega i le teritori, ma ia fa’ailoa ai le mana’omia o le tele o tagata faigaluega ma fesoasoani e foia ai lenei fa’afitauli.
“E tatau ona toe teuteu lea fuafuaga o le paketi ma toe faaopoopo le isi $200,000 e faafaigaluega ai ni tagata suesue se toalua ma maua ai nisi taavale e mataituina ma ta‘u mai ai i latou ua ova i le taimi nei, ona o se vaega lea o le tumutumu o le falepuipui”, o le saunoaga lea a le alii senatoa ia Satele. “O le tolu ai lenei o tausaga talu ona ou i ai i le Ofisa o Femalagaaiga ma e mafai ona ou ta’u atu ia te outou, o lenei faafitauli ua tau le mafai.”
Na ia ta’ua e fa’apea, mai ia Ianuari e o’o ia Iulai o le tausaga nei, e to’a 700 i le 800 le aofa’i o i latou ua ova le aumau i le teritori.
Sa ia taua fo’i e fa’apea, e le lava le totogi o le Pule Sili o Femalagaaiga e $63,000 pe a fa’atusatusa i sui fa’atonusili o isi matagaluega o lo o totogi atu i ai le $70,000 i le $80,000.
Faamanino e Fainuulelei e faapea, o le aofa’i o i latou ua ova ona aumau i le teritori i le masina o Iulai e 200 ae o le isi 200 o tagata faigaluega asiasi mai i le StarKist mai Upolu ua mae’a a latou konekarate ae o lo o i ai pea i le teritori, i le avea ai o i latou ua ova le totogi, lea ua atoa ai le 400.
Na fesili Tuaolo ia Fainuulelei pe aisea ua le faafaigaluega ai e lona Ofisa ni loia mai Samoa tuaoi e fesoasoani i le fa’aitiitia o le tulaga pagatia o lo o i ai le Ofisa o loia i le taimi nei.
Na toe manatua e Fainuulelei e faapea, sa masani ona taulimaina e loia mai Samoa mataupu i Amerika Samoa i tuā i le 1970s. Peita’i, o le. fa’atonuga a le Fa’amasino Sili o lo’o fa’apea, o loia mai Samoa e fia galulue i totonu o le Teritori e tatau ona avea ma sui o le Loia i se setete po’o se teritori o Amerika.
“Ana le seanoa lea tulaga, ou te le faatuai lava i le faafaigaluegaina o loia mai Samoa e fesoasoani i le Ofisa o le Loia Faitulafono a le malo,” o lana faaaliga lea.
Na ia faamatala e faapea, o tamaiti aoga faaloia i Samoa e avea ma loia pe a maua le faailoga o le Bachelor, ae i lalo o le faiga a le U.S, e tatau ona maua e le loia le faailoga o le Bachelor poo le Legum Baccalaureus, ona sosoo ai lea ma le Juris Doctorate, e toe tolu tausaga e alu ai. E le gata i lea, e tatau ona pasia le suega i Amerika Samoa e avea ai ma loia i le teritori.
“Ou te le fia finau ma outou i le mataupu pe agavaa loia mai Samoa i tulaga tau a’oa’oga e galue ai i Amerika Samoa ona o loia mai Samoa o lo o saofa’i i le Faamasinoga a le Lalolagi,” o le saunoaga lea a Tuaolo, e faasino i le loia a Samoa o Tuiloma Neroni Slade sa na filifilia ai se faamasino o le International Criminal Court (ICC) fou i le 2003. O le tulaga maualuga lea faavaomalo ua ausia e se Samoa.
