I aso a la ua leva, sa nonofo ai i lalo ifo tonu lava o se mauga, ia se faifaatoaga ma lona tina matua. E le o ni tagata mau’oa, ae sa iai sa la fanua na toto ai a la meaai ma faatu ai lo la fale, ma tausi ai ni a la manu, o moa, o puaa, o solofanua ma isi lava manu, sa mafai ona tausi ai o la soifua. O lenei faifaatoaga ma lona tina, o ni tagata loto maualalo tele ma le alofa, ma sa o la nonofo fiafia ma le filemu, i lo la fanua i lalo o le mauga.
O le nu’u lea e nonofo ai lenei faifaatoaga ma lona tina, e pulea e se Faipule saua tele lava. O se fitafita e ita tele i se mea po o se tagata e vaivai pe le loto malosi, e pei o ia.
I se tasi o aso na faia ai sana malelega po o sana poloaiga, ina ia fasiotia tagata matutua uma o le itumalo. O vaitaimi ia, sa fai ma masani o tagata o lenei itumalo ona tiai o latou tagata pe a o’o ina matutua ma ua le aoga i ni galuega.
Ina taunuu mai lenei malelelga i le faifaatoaga, sa faanoanoa tele lona loto, ona e alofa tele o ia i si ona tina matua. Ae peitai, sa faafaigata i tagata o le itumalo ona tete’e atu i le faatonuga mai i lenei Faipule saua, aua o le tete’e, e I’u i le oti.
Ua sauni tagata talavou uma o le itumalo, e iai o latou tina ma tama matutua e saili ni auala e mafai ai ona faao’o le oti I o latou tagata matutua, e aunoa ma se tiga.
I se tasi o aso, ina mae’a galuega a le faifaatoaga, sa ia sau i le fale ma kukaina se alaisa. O alaisa e taumamafa ai tagata matitiva i lea itumalo, e lanu enaena. Ina ua maea ona kukaina e le faifaatoaga le alaisa, ona ia tago lea ua faamago, ma saisai i totonu o se ie. Ona sai lea i lona ua faatasi ai ma se kate e tumu i vai. Ona ia fafa loa lea o lona tina matua i lona papatua, ma amata ona savali agai i luga o le mauga.
E ui i le maualuga o le mauga ma le tele o auala na feseta’i solo, ae peitai, sa le i ano iai le faifaatoaga. Na o le pau lava lona manaoga, ia o la taunuu ma si ona tina matua i luga o le tumutumu o le mauga. O le igoa o le mauga lea, ua fa’aigoaina o le mauga e “Tiai ai tagata matutua”.
A’o savali le faifaatoaga i luga o le mauga, na vaai ifo le tina i le tele o magaalu ma pioga sa sopoia e si ana tama. Sa manatu alofa le tina matua i le taimi e toe fo’i mai ai i lalo si ana tama, o le a ia le iloa le auala e toe fo’i mai ai ma le saogalemu, i lalo o le mauga. Na popole le tina i le tele o manu feai i luga o le mauga. O lea, na aapa ane ai le tina I la’au o lo o i tafatafa o le auala, ma gagau ni fasi la’au ma togi i luga o le auala, e amaka ai le ala e toe foi mai ai i lalo si ana tama.
Ua taunuu le faigamalaga a le faifaatoaga ma si ona tina, i le tumutumu o le mauga.
Ua tu’u lemu ifo i lalo e le faifaatoaga si ona tina ma tapena faalelei se nofoaga e mafai ona malu ma puipuia ai o ia. Ma ua tu’u iai le alaisa lea sa ia saunia ma le kate vai. O si ana toe galuega alofa lava lea mo si ona tina. Sa ia faaofuina si ona tina i ofu malulu e tele sa ia aumaia ma ia opoina mai lona tina ma le maligi o ona loimata, ma lona fatu ua nutimomoia i lona alofa i si ona tina.
Ae peitai, sa lototele le tina ma loto malamalama i le me aua faia e si ana tama. Sa ia faapea atu i lana tama, “A e toe fo’i i lalo, vaai faalelei fasi la’au na ou tago gagau ma tauai i luga o le auala, e avea ma ou faasino ala.”
Na matua’i faateia le faifaatoaga i le tala a lona tina ma ia tepa atu i tua i le auala na la o mai ai, o lo o pae ai fasi laulaau e pei ona faia e lona tina. Ua tagi lotulotu le faifaatoaga ona e ui ina malamalama le tina i le mea o le a tupu ia te ia, ae peitai, sa le tu’ua ai lana tausi ma le alofa i si ana tama.
Ua tago atu le faifaatoaga ma opo mai si ona tina ma faapea atu, “Ou te le toe foi. O le a ta toe fo’i faatasi i lalo o le mauga, ma o le a ta feoti faatasi i lo ta fale.”
Ua tago atu nei le faifaatoaga ua toe fafa mai i luga lona tina ma toe agai mai lalo o le mauga. Na pei e leai se avega mamafa o tauave e le faifaatoaga, i le fafaina mai o lona tina ma tamo’e mai i lalo o le mauga, i le auala sa makaina e lona tina i fasi laulaau.
Ina ua o la taunuu i lo la fale, ua tago le faifaatoaga ua vane i luga le fola o le la fale, ma nana ai lona tina i lalo o laupapa o le fola o le fale.
Ae peitai, sa toe sau le fanoga a le Faipule saua, e manao i faamaoniga o le fasiotia o tagata matutua o le itumalo, e ala lea i le aveina o lefulefu o tino maliu o nai tagata matutua, e fili ai se afa. Auoi, ua le mautonu le itumalo i manaoga saua a le alii Faipule.
Ua matuai popole tele le faifaatoaga aua o lea e soifua pea si ona tina. Ae i le atamai o lona tina, sa ia faatonuina ai le faifaatoaga I le auala e mafai ona fili ai ni lefulefu. Ma sa faapea foi ona faaali e le faifaatoaga i tagata o le latou nu’u ina ia mafai ona faasao ai soifua ma ola o nai a latou tagata matutua.
Na maofa le alii Faipule ina ua mafai e le nu’u lea o lo o nonofo ai le faifaatoaga ma lona tina, ona faia lana faatonuga, o le filiina o se afa i lefulefu. Ua fesili le alii Faipule pe na mafai faapefea ona faia e lea nu’u lea mea. Sa lototele le alii faifaatoaga ma ia faamatalaina le tala atoa ma le atamai o lona tina matua sa mafai ona faasaoina ai i latou.
Ua toe nofo lenei alii Faipule saua ma toe mafaufau ma ua ia toe manatua ai, e ui i le taua o le malosi o le autalavou ae peitai, sa ia toe salamo ma ia faapea ifo, “Ae o le poto ma le faautaga loloto o tama ma tina matutua, e faasaoina ai tatou uma.”
O iina na toe ave’esea ai loa le tulafono a lea itumalo, ma ua le toe fasiotia ai tagata pe a matutua.
IA MANUIA TOE FUAFUAGA O LENEI VAIASO!
