Pago Pago - AMERIKA SAMOA
O se tulafono taufa’aofi a le faigamalo a Lemanu-Talauega na pasia i le ulua'i tauaofiaga a le Fono Faitulafono i le tausaga lenei ua sainia e Kovana Lemanu P.S Mauga, e avea ma tulafono.
O le tulafono taufaaofi e fa'atapula'a ai le taimi e mafai ai ona faia fe'ese'esea'iga i fanua ma suafa matai i luma o le Ofisa o Mataupu Tau Samoa, a'o le'i tu'uina atu i luma o le fa'amasinoga mo le fa'amasinoga.
I le taimi nei, e leai se taimi faatapulaa i le umi o suafa matai ma mataupu tau fanua o lo o finau ai le Ofisa o Mataupu Tau Samoa.
O lo o taua i le tulafono taufaaofi e faapea, pe a mavae le ono masina mai le aso na tuuina atu ai le mataupu o le fanua poo le suafa matai i le Failautusi o Mataupu Tau Samoa ma e leai se maliega a itu auai, e tatau i le Failautusi o Mataupu Tau Samoa po o lona sui ona faamaonia i se tusi i le Faamasino Sili, po’o le sui Fa’amasino sili o le Faamasinoga Maualuga, e faapea ua le mafai e itu auai ona usitaia ma po o le faataunuuina o manaoga o le tulafono ma o le a tuuina atu le mataupu i le Vaega o Fanua ma Suafa a le Faamasinoga Maualuga mo le faaiuga.
Na fa’ailoa e Kovana Lemanu i ta’ita’i o Fono i le aso 27 Iuni, ua uma ona ia sainia le pili e avea ma tulafono ma o le a fa’amalosia loa. O le tulafono taufaaofi o loʻo tuʻuina atu ai le aso aoga e 60 aso mai le faaiuga o le tauaofiaga lea na pasia ai.
Na fa’ailoa e Lemanu i le Fofoga Fetalai ma le Peresetene o le Senate e fa’apea, o le taimi ma le taumafaiga sa fa’aalu e i latou ma a latou paaga i le iloiloina o lenei tulafono taua tele, e matua talisapaia lava. Ma sa ia faaopoopo mai, “Tau ina ia faaauau pea ona tatou galulue faatasi e taulimaina manaʻoga o la tatou atunuu.”
I le tuuina atu o le tulafono taufaaofi i le Fono Faitulafono i le amataga o le tausaga lenei, na faailoa ai e le alii kovana i ta’ita’i o Fono e faapea, o le tuai ona foia o se feeseeseaiga i fanua ma suafa, “ua faalavelavea ai le filemu ma le maopoopo o le pulega o mataupu tau aiga ma nuu”.
“O lenei pili e mafai ai ona faagasolo se mataupu i luma o le Faamasinoga Maualuga [a Amerika Samoa] pe a le mafai ona foia i le ono masina talu ona tuuina atu i le Failautusi o Mataupu Tau Samoa,” o le tusi lea a le alii kovana.
I le iloiloga a le komiti a le Senate i le amataga o le tausaga nei e uiga i le tulafono, na taua ai e molimau a le faigamalo e faapea, o le faaumiumi o feeseeseaiga i fanua ma suafa matai-o nisi o taimi e umi ai tausaga e oo atu i le 20 tausaga-na mafua ai ona tuuina atu e le Faigamalo a Lemanu lenei tulafono taufaaofi e toe teuteu ai le tulafono o loo i ai nei.
Ma o afioga i senatoa sa saunoa i le iloiloga e lata i le tasi le itula, sa latou fa’afetaia ai le tulafono ua fuafuaina, ma sa latou fa’ailoa fo’i le tulaga moni o le i ai o suafa matai ma mataupu tau fa’aleaganu’u ua tele tausaga o toso solo.
