Pago Pago - AMERIKA SAMOA
O Falaniko Fetoa’i, o ia o se pagota i le Falepuipui i Tafuna (TCF) o lo o tuli lana fa’asalaga mai le moliaga mamafa na ta’usala ai o ia, ua tu’uaia i le moliaga mamafa e tasi o le sola ese mai le toese.
E tusa ai ma fa’amaumauga a le fa’amasinoga, na logoina leoleo e se tagata na telefoni e le o ta’ua i le aso 13 Iuni 2023, ma na ia fa’ailoa ai o Fetoa’i na iloa atu i fafo o le pa o le TCF. E tusa ai ma le faamatalaga a le tagata e le o faailoaina lona igoa, sa vaaia Fetoa’i i se fale e le mamao ma le Falepuipui o Tamaiti (JDC), ma e fa aso na alu ese ai o ia mai le TCF.
Ona faia lea e le Matagaluega o le Saogalemu Lautele Vice & Narcotics Unit (DPS-VNU) se mataituina o le nofoaga lea na taua o lo o i ai le ua molia.
Pe tusa o le itula e 1:20 i le aoauli, na alu atu ai i fafo se pikiapu sa aveina e se tama’ita’i e igoa ia Alofagia Fetoa’i (to’alua o le ua molia), mai le auala pefu i le isi itu o le JDC ma aga’i atu ai i le alatele a le malo. O le taavale na toso e le DPS-VNU i le fetaulaiga ala e tau atu i le Matagaluega o Galuega Lautele i Tafuna.
I le taimi muamua, sa manatu leoleo e na’o le tama’ita’i ave ta’avale sa i totonu o le ta’avale, ae na latou matauina se isi tagata o lo’o i totonu o le ta’avale o lo’o punou i lalo e pei o lo o taumafai e lafi.
O le tagata lona lua na nofoia na mulimuli ane iloa o Falaniko Fetoa’i. Na loka uma le ulugali’i ma ave i le Ofisa o Leoleo i Tafuna (TPS) mo su’esu’ega.
Ina ua fesiligia e Fetoa’i, na ia fa’ailoa ai e fa’apea, i le aso 13 Iuni 2023 pe tusa o le itula e 6 i le taeao, na fafagu ai o ia e Salvation Va’a - o se tasi o leoleo i le toese - ma fesili atu ia te ia pe mafai ona la o ma ia e fa’aleleia lana ta’avale. Na taua e Fetoa’i e faapea, na ia ioe i ai ma sa latou o ese mai le TCF e ui atu i le faitotoa pito i luma i lea taeao.
Ina ua latou i fafo, na fai atu Va’a ia te ia o le a la o i le fale o lana uo i le auala pefu i le isi itu o le lotoa o le JDC e toe faaleleia lana taavale, ona o lana uo o loo i ai meafaigaluega uma e faaleleia ai. Na taua e Fetoa’i e fa’apea, na mae’a ona ia fa’aleleia le ta’avale a Va’a pe tusa o le itula e tasi i le aoauli ona ia talosagaina lea pe mafai ona ia valaau i lona toalua e piki mai ma ave i le TCF. O lana talosaga na talia e Va’a ma o le taimi na toe ave ai o ia e lona toalua i le TCF na toso ai e le DPS-VNU le latou taavale ma iu ai ina ave i le TPS mo nisi suesuega.
Na te’ena e Fetoa’i lona i ai i fafo o le lotoa o le TCF mo le 4 aso ma sa ia toe ta’ua ai o Va’a sa nafa ma lona i ai i fafo o le lotoa o le TCF.
O lona to’alua o Alofagia Fetoa’i lea na ia ta’ua ai lona iloa, peita’i, sa musu e fai sana fa’amatalaga. Na momoli atu o ia i le TCF lea na taofia ai o ia mo le 48 itula a o faagasolo le tusi saisai.
O le aoauli lava lea, na siaki ai e leoleo le fanau e to’atolu a le ulugali’i, e 11 tausaga le matua, 9 tausaga ma le 5 tausaga, ina ia mautinoa o lo o saogalemu ma tausia lelei i la’ua a’o taofia o la matua i le toese. Na fa’amaonia e le tuagane o le tina o Galu Asotasi ma lona to’alua i leoleo, o le a saogalemu le fanau i lo latou fale i Nu’uuli. Na tu’uina atu fo’i e Leoleo lea mataupu i le DHSS Child Protective Services mo le latou iloiloga.
I se su’esu’ega mulimuli ane ia Iuni 14, 2023, na tu’uina atu ai e le taitai o le falepuipui ia Marion Fitisemanu pepa fa’amau fa’ailoga e amata mai i le aso 09 Iuni, 2023 e o’o ia Iuni 13, 2023 ina ua fa’ailoa e Fetoa’i o ia sa i totonu, ma ina ua toe iloilo.
Ae na taua e Fitisemanu e fa’apea, talu ai ona o le le lava o tagata faigaluega a le TCF, e le o se selau pasene lona mautinoa pe ua mae’a ona fa’atinoina su’esu’ega a le Ofisa. Na ia faaalia e iai nisi o sifi e nafa le toatasi e vaavaaia le silia ma le 300 pagota.
Na fa’afeso’ota’i Va’a i luga o le telefoni feavea’i ma ia tu’uina ai sana fa’amatalaga e fa’apea, o lo’o faigaluega nei o ia i le sifi o le fanuatanu, peita’i e le’i faigaluega i le taeao o Iuni 12 e o’o ia Iuni 13, 2023 ona sa malolo i le aso. Na ia ta’ua fo’i e fa’apea, e le’i fesili lava pe na i ai fo’i se feso’ota’iga ma Falaniko Fetoa’i. Fai mai a ia, na pau le taimi na ia vaai ai ia Fetoa’i, o le taimi na ia faia ai le faitauga o le ulu i le aso 11 Iuni e oo atu i le aso 12 Iuni, 2023 ma sa i ai Fetoa’i i le fale o le TCF Alpha Max lea o lo o loka ai o ia.
O le moliaga o le sola ese mai le toese, o se solitulafono D lea e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e $5,000.00, pe fa’asala fo’i i ia sala tupe uma e lua.
