Lao
This article was added by the user . TheWorldNews is not responsible for the content of the platform.

ລາວເປັນປະເທດ ທີ່ມີອັດຕາສ່ວນ ຂອງຈໍານວນພະນັກງານລັດ ຕໍ່ຈໍານວນປະຊາ ກອນ ໃນອັດຕາສູງທີ່ສຸດ ໃນອາຊຽນ

ລາວເປັນປະເທດທີ່ມີອັດຕາສ່ວນຂອງຈໍານວນພະນັກງານລັດ ຕໍ່ຈໍານວນປະຊາ ກອນ ໃນອັດຕາສູງທີ່ສຸດ ໃນອາຊຽນ ແຕ່ພະນັກງານສ່ວນໃຫຍ່ ບໍ່ມີຄວາມຮູ້-ຄວາມສາມາດ ໃນການປະຕິບັດໜ້າທີ່ໂຕຈິງ, ຊົງຣິດ ໂພນເງິນ ມີລາຍງານເລື້ອງນີ້ຈາກບາງກອກ.

ທ່ານທອງຈັນ ມະນີໄຊ, ລັດຖະມົນຕີກະຊວງພາຍໃນຖະແຫຼງວ່າ ອັດຕາສ່ວນຂອງຈໍານວນພະນັກງານລັດ ຕໍ່ຈໍານວນປະຊາກອນລາວໃນປັດຈຸບັນນີ້ ຢູ່ທີ່ລະ ດັບເກີນກວ່າ 2 ເປີ​ເຊັນ ຊຶ່ງ​ເປັນ​ອັດ​ຕາ​ສ່ວນ ​ທີ່​ສູງ​ທີ່​ສຸດ ​ໃນ​ກຸ່ມ​ອາ​ຊ່ຽນແລະ​ເຮັດ​ໃຫ້ຕ້ອງ​ນຳ​ໃຊ້​ງົບ​ປະ​ມານ ​ສຳ​ລັບ​ເປັນ​ເງິນ​ເດືອນ​ແລະ​ເງິນ​ນະ​ໂຍ​ບາຍ​ໃຫ້​ ແກ່​ພະ​ນັກ​ງານ​ໃນ​ອັດ​ຕາ​ສ່ວນທີ່​ເກີນກວ່າ 46 ເປີເຊັນ ຂອງງົບປະມານລາຍຈ່າຍທັງໝົດຂອງລັດຖະບານລາວໃນແຕ່ລະປີ ທັງຍັງມີທ່າອ່ຽງເພີ້ມຂຶ້ນທຸກປີອີກດ້ວຍ, ດັ່ງນັ້ນ ຈຶ່ງເຮັດໃຫ້ລັດຖະບານລາວຈະຕ້ອງຈໍາກັດໂກຕ້າໃນການບັນຈຸພະນັກງານໃໝ່ໃຫ້ນ້ອຍລົງ ພາຍໃຕ້ເປົ້າໝາຍທີ່ຈະຫຼຸດອັດຕາສ່ວນຂອງຈໍານວນພະນັກງານລັດຕໍ່ຈໍານວນປະຊາກອນລາວໃຫ້ລົງມາຢູ່ທີ່ລະດັບບໍ່ເກີນ 1.8 ເປີເຊັນ ໃຫ້ໄດ້ໃນປີ 2025, ທັງຍັງຈະຄັດເລືອກເອົາຜູ້ທີ່ມີຄວາມຮູ້-ຄວາມສາ ມາດຢ່າງແທ້ຈິງອີກດ້ວຍ ດັ່ງທີ່ທ່ານທອງຈັນ ຢືນຢັນວ່າ:

“ລັດຖະບານ ໄດ້ວາງຄາດໝາຍຫຼຸດຜ່ອນຈໍານວນລັດຖະກອນລົງ ທຽບໃສ່ຈໍານວນພົນລະເມືອງໃນທົ່ວປະເທດ ໃຫ້ຢູ່ໃນລະດັບ 1.8 ເປີເຊັນເພື່ອໃຫ້ສອດ ຄ່ອງກັບລາຍຮັບງົບປະມານຂອງລັດຖະບານປີ 2021, ທົ່ວປະເທດມີພະນັກ ງານລັດຖະກອນທັງໝົດຈໍານວນ 176,151 ຄົນ ໃນນັ້ນ ລັດຖະກອນຄູມີຈໍານວນ 74,041 ຄົນ ກວມເອົາ 42 ເປີເຊັນ ຂອງຈໍານວນພະນັກງານລັດຖະ ກອນທັງໝົດ, ລັດຖະກອນແພດມີຈໍານວນທັງໝົດ 16,254 ຄົນ ກວມເອົາ 9.5 ເປີເຊັນຂອງຈໍານວນລັດຖະກອນທັງໝົດ.”

ສ່ວນ ທ່ານກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ໃຫ້ການຢືນຢັນວ່າ ລັດຖະບານລາວຊຸດປັດຈຸບັນ ຈະບໍ່ຍອມໃຫ້ມີການຊື້ຈ້າງເອົາຕໍາແໜ່ງ ໃນວົງການພະນັກງານຂອງລັດຖະບານຢ່າງເດັດຂາດ, ແຕ່ວ່າ ຈະເນັ້ນໜັກໃນການພິຈາລະນາຈາກລະດັບຄວາມຮູ້-ຄວາມສາມາດໂຕຈິງຂອງພະນັກງານເປັນສໍາຄັນ ກໍຄືມີແຕ່ພະນັກງານທີ່ມີຄວາມຮູ້-ຄວາມສາມາດຢ່າງແທ້ຈິງເທົ່ານັ້ນ ທີ່ຈະໄດ້ຮັບການສົ່ງເສີມໃຫ້ກ້າວຂຶ້ນຕໍາແໜ່ງທີ່ສູງຂຶ້ນ ລວມເຖິງການຄັດເລືອກເພື່ອບັນຈຸພະນັກງານໃໝ່ໃນທຸກໜ່ວຍງານຂອງລັດດ້ວຍ.

ທາງດ້ານທ່ານທອງລຸນ ສີສຸລິດ, ປະທານປະເທດກໍຖະແຫຼງຍອມຮັບວ່າ ການຫຼິ້ນພັກ-ຫຼິ້ນພວກ ແລະການຊື້ເອົາຕໍາແໜ່ງໃນວົງການພະນັກງານຂອງລັດຖະ ບານລາວ ໄດ້ເກີດຂຶ້ນ ພາຍໃນທຸກພາກສ່ວນທົ່ວປະເທດ ເຊິ່ງກໍເຮັດໃຫ້ການ ຈັດຕັ້ງປະຕິບັດໂຄງການພັດທະນາຕ່າງໆຂອງລັດຖະບານລາວບໍ່ບັນລຸເປົ້າໝາຍ ເນື່ອງຈາກວ່າພະນັກງານລັດທີ່ຮັບຜິດຊອບນັ້ນ ບໍ່ມີຄວາມຮູ້ຄວາມສາມາດໃນການປະຕິບັດວຽກງານໂຕຈິງ ໂດຍບັນຫາດັ່ງກ່າວນີ້ຍັງມີທ່າອ່ຽງເພີ້ມຂຶ້ນນັບມື້ອີກດ້ວຍ ເຊິ່ງຖືເປັນສະພາບການທີ່ຂັດແຍ້ງກັບເງື່ອນໄຂ ທີ່ອົງການສາກົນໄດ້ກໍານົດໃຫ້ລັດຖະບານລາວຈັດຕັ້ງປະຕິບັດຢ່າງເຂັ້ມງວດ ເພື່ອຈະໄດ້ຮັບການຊ່ວຍເຫຼືອຕໍ່ໄປ ລວມເຖິງການຊ່ວຍເຫຼືອຈາກທະນາຄານໂລກ 395 ລ້ານໂດລາໃນປີ 2022 ຫາປີ 2026 ດັ່ງທີ່ ທ່ານນາງທິບພະກອນ ຈັນທະວົງສາ, ໂຄສົກຂອງລັດຖະບານລາວໄດ້ຖະແຫຼງຜົນການປະຊຸມຂອງລັດຖະບານວ່າ:

“ກອງປະຊຸມ ໄດ້ຮັບຮອງເອົາແຜນຍຸດທະສາດການຮ່ວມມືລະຫວ່າງລັດຖະບານລາວ ແລະທະນາຄານໂລກປີ 2022 ເຖິງ 2026 ແລະບັນຊີໂຄງການບູລິມະສິດ ເຂົ້າແຜນການລົງທຶນຂອງລັດຖະບານທີ່ຈະໄດ້ຮັບທຶນຈາກທະນາຄານໂລກ ໃນຫ່ວງງົບປະມານສໍາລັບໄລຍະປີ 2023 ຫາປີ 2024, ກອງປະຊຸມໄດ້ຊີ້ນໍາໃຫ້ກະຊວງແຜນການ ແລະການລົງທຶນສົມທົບກັບພາກສ່ວນກ່ຽວຂ້ອງຮີບຮ້ອນປັບປຸງບັນດາໂຄງການ ໃຫ້ຕິດພັນກັບວາລະແຫ່ງຊາດ ແລະນະໂຍບາຍຂອງທະນາຄານໂລກ ເພື່ອຮັບປະກັນການນໍາໃຊ້ທຶນຢ່າງມີປະສິດທິພາບ ແລະປະສິດທິຜົນສູງ.”

ໂດຍລັດຖະບານລາວໄດ້ກໍານົດໂຄຕ້າໃຫ້ບັນຈຸພະນັກງານໃໝ່ໄດ້ບໍ່ເກີນ 1,300 ຄົນ ໃນປີ 2022 ນີ້, ໃນນີ້ ເປັນໂຄຕ້າຂອງກະຊວງສຶກສາທິການ ແລະກິລາ 340 ຄົນ, ກະຊວງສາທາລະນະສຸກ 320 ຄົນ, ສ່ວນກະຊວງອື່ນໆ ລວມເຖິງຫ້ອງການປະທານປະເທດດ້ວຍນັ້ນ ກໍໄດ້ໂຄຕ້າລະຫວ່າງ 3-33 ຄົນ ຈຶ່ງເຮັດໃຫ້ເກີດບັນຫາຂາດແຄນບຸກຄະລາກອນໃນຫຼາຍພາກສ່ວນ ໂດຍສະເພາະແມ່ນກະຊວງສຶກສາທີ່ມີໂຮງຮຽນ 12,744 ແຫ່ງຢູ່ເຂດຊົນນະບົດນັ້ນກໍ່ຍັງຂາດແຄນຄູ 19,757 ຄົນ, ໃນຂະນະທີ່ໂຮງຮຽນຢູ່ໃນຂົງເຂດໂຕເມືອງ ຊໍ້າພັດມີຄູເກີນຄວາມຕ້ອງການເຖິງ 9,664 ຄົນ ທີ່ບໍ່ຍອມໄປສອນຢູ່ໂຮງຮຽນໃນເຂດຊົນນະ ບົດ ຈຶ່ງເຮັດໃຫ້ໂຮງຮຽນ 12,744 ແຫ່ງໃນເຂດຊົນນະບົດຍັງຂາດແຄນຄູຕໍ່ໄປນັ້ນເອງ.